செய்தியாளன், நான்

கண்மூடி கண் திறப்பதற்குள்
மின்கசிவு வெள்ளமென்று
பரவிய வதந்தி
கூட்ட நெரிசலில்
பள்ளி பிஞ்சுகள் 6பேர் டெல்லியில் பலி!

நான்கு கல்லூரி மாணவர்களை
சுட்டுக் கொன்றதாக ஒரு சேதி!

நிலநடுக்கத்தில்
நூற்றுக்கணக்கானோர்
இறந்ததாக வேறொரு சேதி!

இருதயம் வெளித்தெரிய
பிறந்த குழந்தைக்கு
திரும்ப பொருத்தியதாக ஒரு சேதி!

இலங்கை முகாம்களில்
உணவின்றி தினமும்
பத்துக்கும் மேற்பட்டோர்
பலியாவதாக ஒரு சேதி!

விமான ஓட்டிகளின்
வேலை நிறுத்தத்தால்
பலகோடி நஷ;டமென்று ஒரு சேதி!

மழை பொய்த்ததால்
மனைவி மகளை
உத்தரப்பிரதேச விவசாயிகள்
விற்பதாக ஒரு சேதி!
நட்சத்திர விடுதியில்
குண்டு வெடித்ததில்
வெளிநாட்டவர் பலர்
இறந்ததாக ஒரு சேதி!

ரத்தவங்கிகளில்
கலப்பட ரத்தம் விற்பதாக ஒரு சேதி!

வற்றாத அம்மன்குளம்
அபார்ட்மெண்டாக மாறியதாக
படத்தோடு ஒரு சேதி!

ஆர்ப்பாட்டம் மறியல்
பேரணி முற்றுகையென்று
அடுக்கடுக்காய் செய்திகள்

கண்மூடி திறப்பதற்குள்
கடவுள்கூட சுடப்பட்டிருக்கலாம்

24ஒ7 சேனல்கள்
சொல்லிக் கொண்டேயிருக்கின்றன
செய்திகளை

டிபன் சாப்பிட்டபடி
குடித்தபடி புகைத்தபடி
காதலியோடு சிரித்தபடி
எப்படி எப்படியோ..

செய்திகளை செய்திகளாக மட்டுமே
பார்க்கப் பழகிவிட்டன ஜனங்கள்

அளவுக்கு மீறி நஞ்சான அமிர்தம்

செய்திகள்
மனநுட்பங்களை போக்கி
மரமாக்கிக் கொண்டிருக்கின்றன
மனிதர்களை

செய்வதற்கொன்றுமில்லை
ஒன்று விடாமல்
சேகரித்து தந்து கொண்டிருக்கிறேன்
செய்தியாளன், நான்
- வித்யாஷங்கர்

காத்திருத்தல்!

காத்திருத்தல்!

ஏதொன்றுக்கும்
காத்திருக்க வேண்டியிருக்கிறது
எப்போதும் ...

காலைக்கடன் கழிக்க
யாரேனும் கழிவறையில் இருந்தால்
யாரேனும் தினசரி படித்தால்
யாரேனும் குளித்துக்கொண்டிருந்தால்
பேருந்துக்காக
இருக்கை கிடைப்பதற்காக
இப்படி சில்லரை காத்திருத்தலில்லாமல்

சனி பெயர்ச்சிக்காக.
குரு பெயர்ச்சிக்காக,
திசை மாற்றத்திற்காக
காத்திருத்தல் வேறு

உதவுகிறேன் என்றவர்
பதிலுக்காக
நோய் குணமாக
பதவி உயர்வு வர
ஊதிய உயர்வுபெற

உரியவரை தொடர்புகொள்ள
காத்திருக்கும்படி செல்ஃபோன் தெரிவிக்கிறது
தூக்குப்போட புறப்பட்டவன்
என்ன ஆனான்
நாளை வரை காத்திருக்கும்படி
தொலைக்காட்சி தொடர் சொல்கிறது.

மாதக்கணக்கில் நடந்த போட்டியில்
யார் வென்றது
முடிவு அடுத்தவாரம் என்று அறிவித்து விடுகிறார்கள்
எல்லையில் பிடிபட்டவர்
தப்பினாரா? இல்லையா?
அடுத்த இதழில் என்கிறார்கள்

எதற்காவது
எப்போதும்
காத்திருத்தல்
நித்ய கர்மம்
நீண்ட துயர்

எதற்காகவும்
காத்திருக்க
வேண்டாதவர்
எத்தனைபேர்
இப்புவியில்?

பூவிழுமா? தலைவிழுமா?
சுண்டிவிட்ட காசு அந்தரத்தில்

விழுமா? விழாதா?
காத்திருக்கிறேன்
நெடுங்காலமாக ......
- வித்யாஷங்கர் -

தமிழன் பதிப்பகத்திலிருந்து வெளிவர இருக்கும் வித்யாஷங்கர் நூல்கள்........

'பேசாமல் ஒருநாளும்'

(தமிழன் பதிப்பக வெளியீடாக வரும் 'பேசாமல் ஒருநாளும்' கவிதைத்
தொகுப்பில் இருந்து சில......)

1.பேச்சு

1. பேசிக்கொண்டேயிருக்கிறார்கள்
எப்போதும் பேசாமல் இருக்கமுடிவதில்லை எவராலும்
பேச்சில்தான் விளைகிறது வன்மமும், கேலியும் வறட்டு கவுரவமும்
நாவரளப் பேசி நாடாள்வோர் மத்தியில்
பேசிப் பேசியே பேருவகை அடைகிறது வெகு ஜனம்
ஒரு பேச்சுக்கு சொன்னேன்
புகார் ஒன்றுமி;ல்லை


2. மரங்களோடு பேசாமல்
ஒருநாள்கூட கழிக்க முடியாது என்னால்
மரக்கடைகள் கசாப்புக்கடைகள்
அதிகாலை வேளையில் சோம்பல் முறித்து
சிலிர்க்கும் இலைகளின் மலர்ச்சி
சோர்வுற்று மாலையில் மூடிக்கொள்ளும் தளர்ச்சி
வேர்முதல் இலைவரை மழையில் நனைந்த மகிழ்ச்சி
பல கோணங்களிலும்
பேச அவற்றோடு பேசிக்கழிக்க
பகிர நிறைய உண்டு
தினமொரு ஐந்து நிமிடமாவது
பேசாமல் கழித்ததில்லை
ஒருநாளையும்
உங்களது மரமும் சினேகமும் எப்படி?

3.பேச்சற்றிருப்பது பெரும் பேறு
துறவிகளும் தொழிலதிபர்களும் மட்டுமே
பேச்சை குறைத்து அதிகாரமாக்குகிறார்கள்
நடுத்தர வர்க்க நகரமாந்தர்கள்
பேசாமல் பிழைப்பை ஓட்ட முடிவதில்லை
அரசியல் வாதிக்கு கவசமாய்
வியாபாரிக்கு கற்பக விருட்;சமாய்
அதிகாரிக்கு ஏவுதலாய்
விளிம்பு நிலை மாந்தர்க்கு வேதனை வேடிக்கையாய்
குழந்தைகளுக்கு குதுகலிப்பாய்
வெற்றிபெற்றவர்களின் சாகசமாய்
தோற்றவர்களின் துயரமாய்
பேச்சு எங்கும் பேச்சு என்பதே ஆச்சு

4.கொடுத்துக்கொண்டே இருக்கவேண்டியிருக்கிறது
அவன் வருத்தம்
வாங்கிக்கொண்டே இருக்க நேருகிறதே
இவன் வருத்தம்
அவரவர் வருத்தத்திற்கும் ஆயிரமாயிரம் காரணங்கள்

பேச்சு போச்சு
----------------------------
1.தேவைகள் கோரிக்கைகள் உதவி நாடுவதால்
உறவினர்களோடு பேச்சை குறைத்தாயிற்று
பண நெருக்கடியால்
பண உதவி கேட்க நேர்ந்து விடுமோ என்ற பயத்தில்
நண்பர்கள் சந்திப்பை தவிர்த்தாயிற்று
அன்றாட அலுவலக வேலையும் இம்சையும் சலிப்புமாய்
தனக்குத்தான் பேசித்தான்
தீர்க்க வேண்டியிருக்கிறது மனக் கசப்பை

2.கிழக்கு வாசல் புத்திரருக்கு நல்லது
வடக்குப் பார்த்த பீரோ வருவாய் அதிகரிக்கும்
வாஸ்து சொல்லும் திசை எட்டுக்கும் பலனுண்டு
எட்டடி குச்சுக்குள் கைவீசி நடக்க மாட்டாமல் கழியும் காலம்

அவரவர்
--------------------
1.பெரும் பணக்காரருக்கு
பிள்ளை இல்லாதது பிரச்சனை
பெருங்குடும்பங்களுக்கு
பிள்ளைகளால் பிரச்சனை
அதிகாரம் இ;ல்லை! அங்கீகாரம் இல்லை!
ஆஸ்தியில்லை! ஆரோக்கியம் இல்லை!
ஏகமாய் பிரச்சனைகள் எல்லோருக்கும்!
பிரச்சனைகள் பிரச்சனைகள் தான்
அவரவர் பிரச்சனை அவரவருக்கு பெருசு!

சாமக்கொடை

பதினெட்டு பட்டி சூழ
சந்நதம் கொண்ட மாரியாத்தா
சட்டென இறங்கினாள்
பெரியவீட்டு சாந்தி மீது

"என்ன வேண்டும்
கேள் மகனே" என்றாள்.

ஆவேசங் கொண்டாலும்
அழகு ததும்பும்
அவளிடம்
அத்தனை பேர் முன்
எப்படிக் கேட்பேன்
நீதான் வேண்டுமென்று.

- வித்யாஷங்கர்
(ஆனந்த விகடன் முத்திரை கவிதை)

பழஞ்செருப்புகள்

காலணிகள் காணாமல் போவது
யாரையும் ஒரு கணம்
நிலை குலையச்செய்து விடுகிறது

வனவாசம் புறப்பட்ட ராமனின்
பாதுகையை வேண்டி வாங்கியதும்
கல்லிலும் முள்ளிலும் நடக்க விட்டதும்
பாதுகாபபிஷேகம் செய்ததும்
பரதன் கால அரசியல்

புஷ் முதல் சிதம்பரம் வரை
செருப்பு வீச்சில் தப்பியது
இனஒழிப்பு ஆதங்க
அரசியல் வெளிப்பாடு

கல்யாண வீடுகலில்
காலணி களவு போவதும்
கவலையோடு ஒருவர்
வெறுங்காலில் நடப்பதும்
அரசியல் தூண்டிய
காலாகால அவஸ்தைகள்

காலணிதான் என்றாலும்
கனவு போனபின்
கனவிலும் வந்து
தூக்கம் கெடுக்கிறது
பழஞ்செருப்புகள்
-வித்யாஷங்கர்