கவிதலையருவி

கேரளத்து பகவதியின்
அருள் பெருக்கு
அருவியாய்
தாரை தாரையாய்
பொங்கி வழிகிறாள்
வேர் மண் நனைக்க

அகத்தியன் அமர்ந்து
தவசிருந்த அகண்டபாறை நிறைத்து
பெருகிப் பரவுகிறது
சித்தம் போக்கில்
கற்களை சிற்பமாக்கி

சங்கிலி பூதத்தான்
கட்டளைக் கிணங்க
மேகங்கள் குவிந்து
குதித்துப் பெருகுகின்றன
பேரருவியாய்
ஆனந்தப் பேரோசையோடு

பாண்டி மாதேவி
பசியார அள்ளிப்பருகிய நீர்
கைமணத்தோடு பெருகி
மேனி சிலிர்க்க
தோல் துளைத்து
உள் இறங்குகிறது
தாய் ஈரம்

தலை தட்டி
தோள் நழுவி
மயிர்க்கால்கள் சிலிர்ப்புற
வாய் பிதற்ற
அடி வயிற்றில்
அருவியின் நர்ந்தனம்

ஹே மாதா மூதாதையரே
வன தேவதா
வாட்களின் மோதல்
இரைச்சல் கேட்டு ஓய்ந்த
ரத்தம் கழுவிய
மூல அருவியே
மூச்சிரைக்க
பரவசத்தில்
பிதற்றுகிறான்
ஏழாம் தலைமுறை

துள்ளிக் குதித்தும்
தொடர் ஓட்டம் ஓடியும்
தவழ்ந்து பெருகியும்
தடாலென அறைந்தும்
ஆசிர்வதிக்கிறாள்
கவிதலையருவி
தலை தடவி

வரிசையாய்
யானைகள் இழுக்க
வன புத்திரர்கள்
மலை கடந்து
நதி கடந்து
வேரிழந்து
லாரிகளில் ஏற்றப்படுகிறார்கள்

கவிதலையருவி
வம்சவிருட்சம்
சிதையாமல்
வேரில் பாய்ந்து
உயிரூட்டுகிறாள்
வெட்டும் கோடாரிக்காரன்
தாகம் தணித்து...

வித்யாஷங்கர்

(கவிதலையருவி பாபநாசம் அணையிலிருந்து மலைமேல் 7வது கிலோமீட்டரில் சிங்கம்பட்டி ஜமீனுக்கு சொந்தமான எஸ்டேட்டில் உள்ளது. என்னை அழைத்துச் சென்று தனித்து அருவியில் பொங்கிப் பெருகி நனைய வைத்து புலாலும் மதுவும் போதும்போதுமென அருவியிலேயே கிடைக்கும்படி  வந்து ஊட்டி மகிழ்வித்த முரளியின் அன்பிற்கு)